चन्द्रकोटमा दुग्धजन्य पदार्थमा एकरुपता ल्याउने तयारी
महेश बोहरा, गुल्मी भाद्र १९ ।
गुल्मीको चन्द्रकोट गाउँपालिकाले त्रिपक्षीय छलफल तथा अन्तरक्रिया कार्यक्रम आइतबार सम्पन्न गरेको छ । चन्द्रकोट गाउँपालिका पुश शाखाको आयोजनामा दुग्ध उत्पादक कृषक, समुह तथा दुग्ध व्यवसायीहरुसंग छलफल गरिएको हो ।
दुग्धजन्य पदार्थको बजार मुल्यमा एकरुपता ल्याई कृषक तथा व्यवसायीहरुको समस्या समाधानका लागी छलफल केन्द्रित भएको थियो । दुग्ध उत्पादक कृषक, समुह तथा दुग्ध व्यवसायीहरुको साझा सम्झदारीबाट नै दिगोपन निमार्ण गर्न सकिने उद्देश्यले कार्यक्रमको आयोजना गरिएको थियो ।
चन्द्रकोट गाउँपालिमा उत्पादित दुग्धजन्य पदार्थको मुल्य एकरुपता कायम राख्दै उचित मुल्य र स्वस्थ दुुग्ध पदार्थ वितरण गर्ने लक्ष्य राखिएको छ । चन्द्रकोट गाउँपालिकामा दुग्धजन्य पदार्थ उत्पादन गर्ने कृषक, समुह तथा ब्यवसायीहरुको हकहितका लागी दुग्ध उत्पादक कृषक समुह गठन भएको छ ।
सोही कार्यक्रममा हरिबहादुर कार्कीको अध्यक्षतामा ११ सदस्यी कार्यसमित गठन भएको हो । यसले दुग्ध उत्पादनमा लागेका कृषक र बजार व्यवस्थापकको समस्या समाधान गर्नका निम्ति महत्वपूर्ण निकास निकाल्ने विश्वास लिएको गाउँपालिकाका अध्यक्ष युवराज केसीले बताउनुभयो ।
साथै उहाँले कृषकका लागी उत्पादनमा आधारित अनुदान दिनका लागी पनि मापदण्ड तयार हुने अपेक्षा राख्नुभएको छ । कार्यक्रममा गाउँपालिकाका अध्यक्ष युवराज केसी, उपाध्यक्ष बिष्णुप्रसाद भण्डारी, प्रमुख प्रशासकिय अधिकृत बिष्णुप्रसाद भुसाल लगायत सरोकारवालाहरुको सहभागीता रहेको थियो । कार्यक्रमको सञ्चालन गाउँपालिकाका सूचना अधिकृत शिवप्रसाद ज्ञवालीले गर्नुभएको थियो ।
जनाधार मिडिया प्रालि द्वारा सञ्चालीत गुल्मी अपडेट,गुल्मी जिल्लालाई आधार क्षेत्र मानेर २०७८ चैत देखी सञ्चालनमा ल्याईएको हो । सूचना विभागमा ३२१३-२०७८/७९ दर्ता नम्बर रहेको छ ।
