जनता आवास कार्यक्रममा अन्तरर्गत गुल्मीमा ४७ घर बन्दै !




टोपलाल अर्याल गुल्मी ।

जिल्लामा जनता आवास कार्यक्रमअन्तर्गत दुई निर्वाचन क्षेत्रमा ४७ घर निर्माण सुरु भएको छ । दुई निर्वाचन क्षेत्रका चार प्रदेश सांसदलाई घर भागवण्डा गरी घर निर्माण कार्य सुरु भएको हो ।

जिल्लामा प्रमुख जिल्ला अधिकारीको रोहवरमा सहरी विकास तथा भवन कार्यालयले छनोट समिति बनाएको छ । क्षेत्र नं १ का दुई प्रदेश सांसद सुर्दशन बराल र कमलराज श्रेष्ट, क्षेत्र नं २ का प्रदेश सांसद खडक केसीलाई १२÷१२ वटा घर परेका छन् । क्षेत्र नं २ का अर्का सांसद दिनेश पन्थीलाई ११ वटा घर परेको प्रमुख जिल्ला अधिकारी यदुनाथ पौडेलले बताए । जिल्लामा ४७ घर निर्माणको लागि प्रदेश सरकारबाट एक करोड ६४ लाख ५० हजार विनियोजन भएको छ ।

तस्वीर टोपलाल अर्याल

अघिल्लो वर्ष १४ घर मात्रै निर्माण
जनता आवास कार्यक्रमअन्तर्गत गत वर्ष गुल्मीमा १४ मात्रै घर निर्माण भएका छन् ।  प्रदेश नं ५ को भौतिक पूर्वाधार विकास मन्त्रालयले सहरी विकास तथा भवन कार्यालय पाल्पामार्फत गत वर्ष गुल्मीमा जनता आवास कार्यक्रम लागू गरेको छ । जिल्लाका कुल लाभग्राही ४७ जनामध्ये १४ जना अर्थात् २९ दशमलव ७८ प्रतिशतले मात्र घर बनाएको कार्यालयले जनाएको छ । अहिलेसम्म ३१ जनाको घर निर्माणाधीन अवस्थामा रहेको सहरी विकास तथा भवन कार्यालय पाल्पाका निमित्तप्रमुख हरिभक्त श्रेष्ठ जानकारी दिए । उनले लाभग्राही ४७ जनामध्ये दुईजनाले सम्झौता गरेर काम नै नगरेको बताए । गरिब, दलित, पछाडि पारिएका वर्ग तथा लोपुन्मुख जातिको लागि प्रदेश सरकारले जनता आवास कार्यक्रममार्फत घर बनाउन आर्थिक सहयोग उपलब्ध गराएको हो ।

चार किस्तामा रकम पाउने
यो कार्यक्रमअन्तर्गत घर बनाउने लाभग्राहीले चार किस्तामा रकम पाउँछन् । एकजना लाभग्राहीले तीन लाख ५० हजारका दरले रकम पाउने भएका छन् । जम्मा रकममा पाँच प्रतिशत ‘कन्टेन्जेन्सी’ खर्च कटाउँदा प्रति लाभग्राहीले तीन लाख ३३ हजार तीन सय ३३ खुद रकम प्राप्त गर्दछन् । पहिलो किस्ता सम्झौता गरी घरको जग पुरेपछि २५ प्रतिशत, त्यस्तै डिपिसी गरेपछि दोस्रो किस्तामा ३० प्रतिशत, लाभग्राहीले घरको गाह्रो लगाएपछि तेस्रो किस्ताबापतको ३५ प्रतिशत र पूरै घर निर्माण भएपछि अन्तिम किस्ताबापतको १० प्रतिशत रकम वितरण गर्ने सहरी तथा भवन कार्यालय पाल्पाका प्रमुख श्रेष्ठले बताए ।

कहाँ–कहाँ बन्दै छन् घर
जिल्लाका ४७ वटा घर चार प्रदेश सांसदलाई भाग लगाइएको छ । जसअन्तर्गत क्षेत्र नं दुईवटै निर्वाचन क्षेत्रको मुसीकोट र रेसुंगा नगरपालिकामा पाँच÷पाँच, सत्यवतीको लिम्घामा आठ, चन्द्रकोटको रूपाकोटमा चार, इस्मा गाउँपालिकामा चार घर परेका छन् । त्यस्तै, मालिका गाउँपालिकामा चार, मदाने गाउँपालिकामा दुई, धुर्कोट गाउँपालिकामा पाचँ, रेसुंगा नगरपालिकामा पाँच, छत्रकोट गाउँपालिकामा दुई, गुल्मी दरबारमा चार र रुरु गाउँपालिकामा चारवटा घर निर्माण गरिने सहरी विकास कार्यालय पाल्पाले जनाएको छ ।

घर पाउँदा खुसी
इस्मा गाउँपालिका–४ की सुन्तली विक वर्षांै खरे घरमा बसिन् । ठूलो वर्षा भए कहाँ सुत्ने पिरलो हुन्थ्यो । उनी विपन्न दलित एकल महिला भएकाले घर बनाउने उपाय थिएन । उनले गाउँमा हाक हाल्ने र मेलापातबाट जीवन कटाएकी छन् । गत वर्ष प्रदेश सरकारले घर बनाउने कार्यक्रम ल्याएपछि सुन्तली त्यसको छनोटमा परिन् । मिहिनेतले काम पनि गरिन् । काम सम्पन्न भएका अहिले चिटिक्कको घरमा बर्खा कटाइरहेकी छन् । ‘मेरो जीवनलाई ढुक्कको घर पाएँ खुसी छु,’ उनले भनिन्, ‘हात चल्ने वेलासम्म गरेर खान्छु ।’

प्रतिक्रिया दिनुहोस्
हालसम्म यो वेबसाइट डेमो प्रपोजको लागि मात्रै हो ।
सम्पादक
विज्ञापनको लागि
वरिष्ठ संवाददाता
संवाददाता